Tovuzun tanınmış ziyalı qadınlarından , şəfalı həkimlərindən olan ,2002- ci ildə dünyasını dəyişmiş Səmayə İsa qızı Məmmədovanın ( Nağıyeva) bu gün doğum günüdür… Onun 76 yaşı tamam olur. 30 ildən çox insanların,əsasən də körpələrin sağlamlığının keşiyində dayanmış Səmayə həkimi bu gün hamı xoş xatirələrlə yad edir.Onun əziyyəti, zəhməti hesabına şəfa tapmış körpələr artıq özləri nənə, babadırlar. Əziz xatirəsi uca tutulan Səmayə həkimə Allahdan rəhmət, yaxınlarına səbr diləyirik…
Səmayə İsa qızı Məmmədova — 28 aprel 1938-ci ildə Zəngilan rayonunun Pirçivan kəndində anadan olub. Atası İsa , anası Balaxanım mahalda sayılıb seçilən ziyalı və zadəgan nəsillərin nümayəndələridirlər. Orta təhsilini fərqlənmə ilə Zəngilanda alan Səmayə xanım, 1955- ci ildə N.Nərimanov adma Azərbaycan Dövlət Tibb İnstitutuna daxil olmuş, 1962-cı ildə institutun müalicə-profılaktika fakültəsinin pediatriya şöbəsini fərqlənmə diplomu ilə bitirmişdir. Həyat yoldaşı Nəsib Nağıyevlə institutda tanış olmuş və Nəsib həkim ilk tibbi peşə fəaliyyətinə 1960-cı ildə təyinatla göndərildiyi Şəki rayonunun Baş Layski kənd xəstəxanasının baş həkimi vəzifəsində işləməklə başladığı üçün təyinatla 1962-ci ildə oraya getmişdir. 1962-1965-ci illərdə həmin kənddə uşaq həkimi işlədikdən sonra, 1965-ci ildə gənc ailə Tovuza dönmüşdür. Səmayə həkim 1965-1967-ci illərdə Tovuz rayonu Qovlar qəsəbəsində yerləşən uşaq -internat məktəbində həkim- pediatr vəzifəsində işləmişdir. 1967-ci ildən 2002-ci ilədək Tovuz rayon Mərkəzi Xəstəxanasının pediatriya şöbəsində müxtəlif vəzifələrdə çalışmışdır. Tovuzda körpələrin müalicə olunması, şəfa tapması yolunda Səmayə həkimin əvəzsiz xidmətləri danılmazdır.Ona görə də Az.SSR Ali Soveti Rəyasət Heyətinin fəxri fərmanı ilə; “Əməkdə igidliyə görə” medalla, 1-ci dərəcəli həkim-pediatr, 5 övlad böyütdüyü üçün “Qəhrəman ana” medalı ilə təltif edilmişdir. Səmayə həkim 1971-1979 –cu illərdə Tovuz Rayon mərkəzi xəstəxanasının partiya komitəsisnin sədri kimi ictimai vəzifədə də çalışmışdır. Hazırda onun sənətini qızı Aybəniz həkim davam etdirir. Səmayə həkim dünyasını dəyişsə də daima onun əziz xatirəsini uca tutan həyat yoldaşı, 5 övladı, 10 nəvəsi, 1 nəticəsi var…
Biz də bir daha elə-obaya yarıyan,onun xeyrinin –şərinin daima iştirakçısı olan, xatirələrdə əziz və mehriban insan kimi qalan Səmayə həkimə Allah rəhmət eləsin deyirik , şərəflə yaşadığı ömrünün qısa olmasından heyfslənirik. Allah rəhmət eləsin, əziz və sevimli anamız və həkimimiz…
Ərhun